Куни кеча биз телевидение орқали муҳтарам Президентимизнинг Республикамиз пахтакорлари ва барча меҳнаткашларига йўллаган табригини эшитиб жуда ҳам мамнун бўлдик. Табрикда Навбаҳор туманидаги бизнинг "Янги ер” фермер хўжалиги ҳам алоҳида эътироф этилгани оиламиз ва фермер хўжалигимиз аъзоларининг қувончига олам-олам қувонч қўшди.

Истиқлолнинг дастлабки йилларидан бошлаб муҳтарам Президентимизнинг барча соҳалар сингари қишлоқ хўжалиги соҳасига, хусусан, фермер хўжаликлари фаолиятини қўллаб-қувватлашга қаратаётган чексиз эътиборлари фермерларимизнинг кучига куч, ғайратига ғайрат қўшмоқда. Шу сабаб мен ҳам қишлоқ мулкдорларига ҳавас қилиб, 2000 йилда"Янги қўрғон” қишлоқ фуқаролар йиғини ҳудудида "Янги ер” фермер хўжалиги ташкил этиб, 102 гектар ер майдонида деҳқончи-лик билан шуғуллана бошладим.

Сўнгги 2012-2014 йилларда ҳар гектар ердан 42-48 центнердан пахта, 65-70 центнердан ғалла етиштириб давлат олдидаги шартномавий режани ортиғи билан бажариб, халқимиз олдида юзимиз ёруғ бўлиб келмоқда.

Жорий йилда эса 50 гектар ер майдонига ғалла уруғини қадаб, ўз вақтида амалга оширилган агротехник тадбирлар натижасида шартномавий режадаги 188 тонна ўрнига 375 тонна дон етиштириб, шундан 232 тоннасини давлат омборига топширдик. Қолган 143 тонна дон маҳсулоти фермер хўжалигимиз ишчи-хизматчилари ҳамда маҳалламиздаги кам таъминланган ва эҳтиёжманд оилаларга тарқатилди.

Шунингдек, эрта баҳорда 52 гек-тар ер майдонига пахтанинг "Бухоро-102” навли элита авлодини эккан эдик. Мураккаб иқлим шароитида табиат инжиқликларига қарамасдан ҳосилдорликни ошириш борасида барча агротехник қоидаларни қўллаб, шартномавий режадаги 189 тонна ўрнига ҳар бир гектар ердан 51 центнердан ҳосил олиб, давлатимиз омборига 265 тоннадан ортиқ пахта хомашёси етказиб бердик. Бу каби ютуқларимизнинг асосий омили иш-нинг тизимли равишда ташкил этилганлиги ҳамда ёқилғи ва минерал ўғит маҳсулотлари ўз вақтида даланинг ўзига етказиб берилганлиги десам, асло муболаға бўлмайди.

Бугунги кунда фермер хўжалиги-мизда 40 нафар киши доимий, 73 нафар киши мавсумий иш билан таъминланган. Уларнинг ўртача ойлик иш ҳақи 500 минг сўмдан 630 минг сўмгача ташкил этади.

Олинган соф даромад эвазига асаларичилик, балиқчилик ҳамда чорвачиликни йўлга қўйиб, фермер хўжалигимизни кенг тармоқли фермер хўжалигига айлантириб, ҳар йили туманимиздаги коллеж ўқувчиларининг 8 нафарини доимий иш билан таъминлаб келмоқдамиз.

Бундан ташқари, фермер хўжалигимиздаги 20 нафарга яқин кам таъминланган иш-хизматчиларнинг барча коммунал тўловлари фермер хўжалик ҳисобидан ҳомийлик асосида амалга оширилмоқда.

2013-2015 йилларда даромад ҳисобидан лизинг асосида 6 та турли русумдаги ҳайдов, чопиқ ва транспорт тракторлари, 2 та тиркама, 1 дона Пон-3+1х40 русумли ер ағдариш мосламаси, 1 дона ғўза ораларига ишлов бериш мосламаси, 1 та юк автомашинаси, 1 та ўғит сепгич, 1 та дори пуркагич агрегатлари ҳамда 1 та "Nexia” русумли ҳамда 1 та "Damas” русумли автомашиналар харид қилдик.

Бундан ташқари, фермер хўжалигимизнинг соф даромадлари ҳисобидан кам таъминланган оила фарзандларидан 9 нафарининг олий ўқув юртларида ўқиши, 4 нафарининг чақирув-сафарбарлик резервида хизмат қилиши учун шартнома тўловларини амалга оширилди.

Шуни фахр билан айтиш мум-кинки, бугунги кунда муҳтарам Юртбошимизнинг олиб бораётган оқилона ва одилона сиёсатлари ҳар бир юртдошимиз қалбида чексиз ифтихор уйғотмоқда. Барча соҳаларга кўрсатаётган улкан эътибор туфайли давлатимиз қисқа вақт ичида жадал ривожланиб, натижада бугун ҳеч кимдан кам эмаслигимизни ва кам бўлмаслигимиз жаҳонга намоён бўлди. Айни кунларда далаларимизда оқ-олтин мўл. Бир сўзли ва бир-биридан чаққон фермер аъзоларимиз теримни бир дақиқа бўлсада сусайтирганлари йўқ. Мақсадимиз йиғим-терим охиригача янада юксак маррраларни забт этишдир. Яратганни сийлагани шу бўлса керакки, ҳали далаларимизда ҳосилнинг чўғи баланд. Дарҳақиқат, бу кунлар-тўқчилик ва тўкин-сочинликнинг рамзи бўлса ажабмас.

Биз фермерлар ҳам истиқболда давлатимиз раҳбарининг ишончини янада оқлаб, юртимиз иқтисодий ривожига ўзимизнинг муносиб ҳиссамизни қўшишда давом этаверамиз.

Ойбек ҲАМРОЕВ,

"Янги ер” фермер