Хабарингиз бор, жорий йил 12-13 март кунлари мамлакатимиз раҳбарининг вилоятимизга ташрифи чоғида воҳани инвестиция ва инновациялар ҳудудига айлантириш таклифи илгари сурилган эди.
Мазкур ташаббус юзасидан 30 апрель — 1 май кунлари "Invest in Navoi” II халқаро бизнес форуми бўлиб ўтди. Унда дунёнинг 40 дан ортиқ жумладан, Канада, Германия, Испания, Россия, Корея, Хитой, Эрон, Жазоир каби мамлакатларидан 300 нафарга яқин инвестор, шунингдек, хорижий мамлакатларнинг юртимиздаги фавқулодда ва мухтор элчилари, дипломатлар иштирок этди. Форумнинг биринчи куни меҳмонлар Навбаҳор ва Кармана туманларига ташриф буюриб, мазкур ҳудудлардаги туристик объетларни кўздан кечиришди. Асосий тадбирлар "Навоий” эркин иқтисодий зонаси ҳудудидаги корхоналарда бўлиб ўтди. Бу ерда ҳудудларнинг инвестициявий жозибадорлиги намойиш этилди. Хусусан, хорижлик тадбиркорлар туманимизнинг қишлоқ хўжалиги имкониятлари, бентонит конларига катта қизиқиш билдиришди.
Анжуман доирасида Канаданинг "Advansedbiotechnologies” компаниясибилан ҳамкорликда этанол ва биодизел ишлаб чиқариш лойиҳаси юзасидан меморандум имзоланди. Мазкур корхонага Қушқочди қишлоғи ҳудудидан 106 гектар ер майдони ажратилган.
– Чиқиндилардан биоёнилғи ишлаб чиқариш безнеснинг истиқболли йўналишларидан саналади, - дейди Канаданинг яна бир "Abot genetik" компанияси бош директори Павел Мачхельянц. – Навоий вилоятингизнинг ижтимоий-иқтисодий имкониятлари билан танишиб, ҳудудда мазкур йўналишда янги корхона ташкил этишга қарор қилдик. Бугунги кунда Навбаҳор туман ҳокимлиги билан биргаликда ишларни бошлаб юбордик.