Бахт ҳақида ҳар ким ҳар хил фикр билдиради.
Кимларгадир бахт енгил ҳаёт кечиришда бўлса, яна кимларгадир мўмай даромад
ҳамда қўша-қўша иморатлар солишда. Хуллас, бахтни ҳар ким ўз тассаввурича
талқин этади. Мен учун бахт тинч-тотув яшашда. Ҳа, тинчлик 
бўлсагина ўз
олдингизга қўйган мақсадга эришасиз. Тинчлик бўлсагина осуда ухлаб, тонгда
кулиб кўз очасиз. Тинчлик бўлсагина ишингизда унум бўлиб, эртанги кун учун
ғайрат-шижоат билан меҳнат қиласиз. Тинчлик бўлсагина юз-кўзларингиз қувнаб тўю
томошадан бўшамайсиз.
Бугун мен товушимнинг борича: -Кўринг, ҳавас қилинг, биз бахтли ёшлармиз! -дея баралла айтишга ҳақлиман. Чунки, нафақат биз ёшлар, Ўзбекистон деб аталмиш юртда истиқомат қилувчи барча инсонлар бахтли-тахтлидир. Боиси, кундан-кунга гуллаб яшнаётган мустақил юртимда озод ва эркин яшаш бахт эканлигини билмаганлар биздан сўрасин. Ажинабий дўстларимиз яшаш нелигини биздан келиб ўргансин. Бугун юртимни куйламоқ бўлиб қўлга қалам олдиму унинг мадҳини не сўз билан таъриф этишга ожизлик қилиб турибман.
Дарвоқе, ҳар йили халқимиз катта қувонч, фахр-ифтхор билан бир тан, бир жон бўлиб, мустақиллик байрамига тайёргарлик кўради. Истиқлолимизнинг 24 йиллиги кун сайин яқинлашаётган шу кунларда Президентимизнинг "Ўзбекистон Республикаси давлат мустақиллигининг йигирма тўрт йиллик байрамига тайёргарлик кўриш ва уни ўтказиш тўғрисида”ги қарори қабул қилингани бутун халқимиз руҳини янада кўтариб юборди. Ана шу қарорни эшитган ҳар бир инсон янада куч-ғайратга тўлиб меҳнат қучоғига отланди. Пиру бадавлат отахону онахонларнинг қўллари эса дуода: "Шундай кунларга етказганига шукур” дейишдан чарчамайди улар. Ҳа, Қарорнинг мазмун-моҳиятига кўз югуртирар эканмиз, дарҳол мозийга эътибор қаратамиз. Ахир, ота-оналаримизнинг таъбири билан айтганда "Бу кунларга етганлар бор, етмаганлар бор. Мустақилликка эришгунча қанча-қанча довонларни босиб ўтишга тўғри келди...” Дарҳақиқат шундай. Биз ёшлар ҳам кексаларимизнинг пурмаъно ўгитларига эътибор қилиб, мустақиллигимиз бахт ато этганига яна бир карра имон келтирамиз.
Истиқлолимизнинг 24 йиллик тўйи муносабати билан ўтадиган тадбирлар эса "БЕТАКРОРИМСАН, ЯГОНАСАН, ОНА ВАТАНИМ-ЎЗБЕКИСТОНИМ!” деган эзгу ғояни ўзида мужассам этишида олам-олам маъно-мазмун бор. Бу шиорга кўзи тушган ёки эшитган ҳар бир қалб тетиклашиб, руҳи кўтарилиши тайин. Мустақил-лик биринчи навбатда бизга бахт эшикларини очган бўлса, иккинчи навбатда эса кенг имконятлар яратиб берди. Бугун кўкрагимиз тоғдек юксак. Қўлимизни кўтарсак, осмонга еткулик. Дастурхонларимиз тўкин-сочин. Эҳ-ҳе, бу ҳақда гапирсак гап тугамайди. Келинг, азиз тенгдошлар, мана шундай гўзал юритмизни бундан-да гўзал бўлишига ўзимизнинг ҳиссамизни қўшайлик. Олтиндан-да зиёда бўлган тупроғимизнинг ҳар бир заррасини кўзга суртиб яшайлик. Мустақиллигимизга, тинчлигимизга кўз тегмасин, илоҳим!
Бобур ЖЎРАЕВ,
НДПИталабаси.
